Селекцијата на Финска е првиот противник на Македонија во квалификациите за пласман на наредното Европско првенство кое ќе се одржи во 2022 година.

Нашите најдобри ракометари предводени од селекторот Данило Брестовац в среда (4. ноември) од 20.00 часот во СЦ „Борис Трајковски“ – Скопје ќе ја имаат фаворитската улога, но истата треба да ја оправдаат на теренот.

Коронавирусот направи проблеми и во спортскиот свет, тројца македонски репрезентативци нема да бидат дел од првите два меча од квалификацискиот циклус, воедно мечот во главниот град ќе биде одигран пред празни трибини.

И Финците имаат проблеми во својот состав, нивниот стратег Ола Линдгрен истакна дека недостасуваат тројца играчи.

– И повредите се дел од спортот. Ќе го дадеме максимумот со играчите кои ги имаме на располагање. Македонија е дефинитивно едно од најтешките места за старт на квалификациски циклус. Противникот е многу тежок на негов терен. Немавме среќа во жрепката добивајќи ги овие ривали (Македонија, Данска, Швајцарија), но како и да е, едвај ги чекаме натпреварите.

Доколку сакаме да бидеме подобри, добро е да се игра против вакви тешки репрезентации. Ќе ни треба време како селекција, да видиме до каде сме, се фокусираме само на нашиот план – вели Ола Линдгрен, селекторот на Финска.