Лексикографите на Оксфордскиот речник на англискиот јазик го избраа зборот, односно фразата за 2022 година – „гоблински режим“ („goblin mode“), жаргонски термин кој опишува отфрлање на општествените очекувања и живеење на неуреден, хедонистички начин, пишува „Би-би-си“.

Имено, оваа фраза била една од трите потенцијални избори на лексикографите од Оксфорд – вториот избор бил „метаверзум“, со 14.484 гласови, а третиот избор бил хаштагот „#IStandWith“, со 8.639.

„Гоблински режим“ бил победничкиот термин избран од 318.956 луѓе, со добиени 93 отсто од гласовите.

Овој термин првпат се појавил на веб-страниците во 2009 година, но станал исклучително популарен на почетокот од 2022 година.

Претставникот на Оксфордскиот речник, Каспер Гратвол изјавил дека тој и неговите колеги се надевале дека јавноста ќе ужива во процесот, но дека биле изненадени од големата заинтересираност.

„Имајќи предвид низ каква година поминавме, ‘гоблински режим’ е термин погоден за сите кои се чувствуваат како да им е преку глава од сè. Олеснувачки факт е дека признаваме дека не секогаш сме идеализираната, курирана верзија од себе која ја претставуваме на социјалните мрежи“, истакнал Гратвол.

Минатогодишниот „збор на годината“ беше „вакс“ („wax“), кој вклучува сè што е поврзано со вакцината против коронавирусот.