Повеќе од 200 лица биле уапсени во изминативе денови во Саудиска Арабија поради „непристојно“ однесување и „вознемирување“, во текот на првата акција од тој тип, по ублажувањето на социјалните норми во оваа ултраконзервативна земја.

Во текот на оваа недела околу 120 мажи биле уапсени поради „непристојно облекување“, открила полицијата во Ријад, преку низа на објави на Твитер.

Во овие објави се додава дека на приведените им била изречена казна, но не е откриено каква. Уште 88 други лица биле уапсени поради „вознемирување“.

Станува збор за првата кампања од овој вид откако престолонаследникот Мохамед бин Салман започнал со ублажување на конзервативните закони во земјата кој се обидува да се отвори кон Западот.

Како резултат на овие реформи, Бин Салман повторно отвори кино сали, им дозволи на жените да возат, како и да се организираат концерти и спортски настани.

Овие потези ги поздравија бројни Саудијци, од кои две третини се помлади од 30 години.