ОЈО Прилеп утврдува евентуална кривична одговорност за забавата во ноќен клуб
Прилепчани признаваат дека не се почитуваат мерките ниту дистанцата помеѓу масите во кафулињата.
Почитување на постоечките но и воведување на поригорозни мерки бараат прилепчаните откако прилепското основно јавно обвинителство оформи предмет по допрен глас за викенд забавата со многу млади во ноќен клуб во Прилеп.
-Основното јавно обвинителство Прилеп оформи предмет по допрен глас поради сомненија дека едно правно лице и едно физичко лице – одговорно лице во правниот субјект сториле кривично дело – Непостапување според здравствените прописи од член 206 од Кривичниот законик, соопшти Обвинителството.
Оттаму наведуваат дека во услови на прогласена пандемија од Ковид-19, спротивно на законските прописи и пропишаните мерки за заштита, во вечерните часови на 18 јули во правното лице – угостителски објект била организирана забава на која биле присутни поголем број посетители. Постапувајќи по оформениот предмет, надлежното обвинителство издало наредби за утврдување на фактичката состојба и евентуалната кривична одговорност, како и за обезбедување докази.
Од обвинителството велат дека сѐ уште прибират докази и сослушуваат сведоци.
Прилепчани признаваат дека не се почитуваат мерките ниту дистанцата помеѓу масите во кафулињата.
Во Прилеп моментално се активни 55 случаи од кои 37 се наоаѓаат на домашно, а 18 лица на болничко лекување. Во домашна изолација и самоизолација се наоѓаат 83 лица. Од почетокот на пандемијата се вкупно 312 заразени од Ковид-19.