Ојлески: Нема да биде лесно, но ќе играме на победа против ППД Загреб!
Денеска играчите на Еурофарм Пелистер ќе го продолжат настапот во СЕХА Газпром лигата, нов ривал од 20.00 часот во Хрватска е составот на ППД Загреб.
Тренерот на битолската екипа, Жељко Бабиќ нема да има на располагање четири играчи поради физички проблеми, но се надева дека барем еден ќе врати во тимот за двомечот од Лига Европа против унгарската Татабања, иако и тоа не е сигурно.
Левото крило на клубот, Гоце Ојлески и неговите соиграчи ветуваат максимална борба во обид да ги освојат бодовите на ова гостување.
– Одработивме добро подготовки, бевме во Загреб и игравме тест натпревари. Мислам дека добро се подготвивме, со исклучок на неколку ракометари кои имаат мали проблеми. Одиме во Загреб да се надигруваме и знаеме каков противник ќе имаме. Се работи за екипа која скоро секоја година игра Ф4 на СЕХА лигата. Нема да биде лесен натпревар, но ќе играме на победа. Ќе дадеме максимум и ќе видиме што ќе се случи.
Успех во Загреб ќе ни донесе голема самодоверба и добар влез во втората полусезона. Ни следат повеќе натпревари и добар старт во Загреб добро би ни дошол. Ни следи брзо потоа и Татабања во Битола и се надеваме на добри резултати – вели Ојлески.
Во рамките од групата „А“ по три бода имаат Еурофарм Пелистер и ППД Загреб, без бодови се Металопластика (Србија) и Татран Прешов (Словачка).