Доколку Бугарија ги исполни критериумите за еврозоната, нема никакви пречки да го воведе еврото од 1 јануари 2026 година, изјавија извори од Брисел за БНР, пренесува „Сега.бг.њус“. Засега Бугарија сама не го исполнува критериумот ценовна стабилност. Одлуката мора да ја донесе Советот на ЕУ и се очекува тоа да се случи во текот на летото, јавува националното радио.

Бугарија веќе изрази намера да побара вонреден извештај за конвергенција за исполнување на критериумите за еврозоната. Премиерот Росен Желјазков изјави дека тоа ќе се случи по состанокот на Еврогрупата на 17 февруари.

Причината е што вакви извештаи се подготвуваат еднаш на две години. Од Брисел потврдија дека на наредната средба, новата бугарска влада и новата министерка за финансии Теменушка Петкова имаат амбиција да ги информираат колегите од еврозоната како земјата ги исполнува критериумите. Сепак, на самата средба нема да се донесе одлука.

„Нема рок за проценка на нашата подготвеност. Во секој случај, треба да се почека проценката на Евростат, која ќе биде објавена напролет“, објавија медиумите.