Рожер Федерер во средата имаше артроскопска операција на коленото и токму поради таа повреда ќе го пропушти наредниот грен слем сезонава, „Ролан Гарос“ во Франција (24 мај – 7 јуни 2020).

Многумина ваквата повреда веќе ја дефинираа како крај на кариерата на швајцарскиот тенисер, веќе подолг период го мачи коленото на десната нога и затоа беше принуден да оди на операција во својата држава.

Федерер успеа само еднаш да го освои „Ролан Гарос“, и тоа во 2009 година, а истиот турнир го пропушти уште трипати од 2016 до 2018 година, а лани стигна до полуфиналето.

pic.twitter.com/VVGI1o8XYZ

— Roger Federer (@rogerfederer) February 20, 2020

Лекарите се сигурни дека Швајцарецот ќе се опорави, но ќе мора да ја пропушти целата сезона на земја како и Мастерс турнирите во Мајами и Индијан Велс.

Федерер само кратко порача дека има намера да се врати на „Вимблдон“ (29 јуни – 12 јули 2020).

– Ќе се видиме на трева – вели Швајцарецот кој минатата година загуби од Новак Ѓоковиќ во финалето на „Вимблдон“.

Како што напиша на „Твитер“ неговото десно колено веќе одредено време му прави проблеми и се надеваше дека ќе помине, но…

– Но, после прегледите и разговорите со тимот, се одлучив за операција во Швајцарија. После зафатот лекарите потврдија дека беше право време за операција и воедно рекоа дека имаат добро чувство што се однесува до целосно опоравување. За жал ќе ги пропуштам Дубаи, Индијан Велс, Богота, Мајами и Ролан Гарос. Благодарност за поддршката. Едвај чекам да се вратам, се гледаме на трева – напиша Федерер.