Јапонската влада одлучи Олимписките и Параолимписките игри во Токио да се одржат без присуство на навивачи од странство поради загриженост од ширење на коронавирусот.

Според новинската агенција „Киодо“ и свечената церемонија на отворање на Игрите ќе биде одржана без гледачи.
„Организацискиот одбор одлучи дека е неопходно церемонијата да се одржи зад затворени врати, дозвололувајќи само учесниците и лицата со покани да бидат дел од овој настан. Причината за овој чекор е да се избегне метежот кој се создава среде пандемија“, соопшти владата на Јапонија.

Неодамна беше спроведена анкета во Јапонија на која резултатите покажаа дека Јапонците се против одржување на Олимписките игри во Токио бидејќи приливот на туристи од целиот свет може да предизвика ново ширење на коронавирусот. Истражувањето покажа дека 77 проценти од испитаниците се против тоа на странските граѓани да им се дозволи влез во Јапонија, а само 18 проценти се за оваа идеја.

Досега во Јапонија се продадени 900.000 влезници за Олимписките и Параолимписките игри.
Олимписките игри во Токио требаше да се одржат минатото лето, но поради пандемијата на коронавирусот тие се презакажани за оваа година и ќе се одржат од 23 јули до 8. август.