Официјално: Украина сака да биде домаќин на Мундијалот во 2030!
Тоа што вчера беше најавено од светските медиуми денес доби и официјална потврда – Украина сака да биде дел од организацијата на Мундијалот во 2030.
Украина во овој момент е во воена состојба поради агресијата на Русија, па иако во оваа земја ретко кој размислува за фудбал во овој период, сепак стигна потврдата дека сакаат да бидат вклучени.
Португалија и Шпанија кои од претходно најавија заедничка кандидатура, сега ја вклучуваат и Украина како трет организатор.Информацијата ја потврдија денес лидерите на трите фудбалски федерации.
„Ваквата одлука е логична и природна. Наша чест е да ја вклучиме Украина во нашата кандидатура. УЕФА е веќе информирана и ни даде целосна поддршка. Мораме да дадеме надеж на народот во овзаа земја“, изјави претседателот на фудбалскиот сојуз на Португалија Фернандо Гомеш.
Слична беше и изјавата на првиот човек на шпанската федерација, Луис Рубиалес.
„Сега ова е европска кандидатура. Со овој потег правиме чекор напред“, порача Рубиалес од седиштето на Нион во Швајцарија.
Ќе потсетиме, Светското првенство оваа година ќе започне на 20. ноември и се одржува во Катар, додека домаќини на Мундијалот во 2026 ќе бидат Канада, Мексико и САД.