Официјално: Куман не е повеќе тренер на Барселона

Барселона го отпушти Холанѓанецот Роналд Куман по поразот од Рајо Ваљекано во шпанската „Ла Лига“/ фото: EPA-EFE/Alejandro Garcia

После поразот во најквалитетната шпанска фудбалска лига од Рајо Ваљекано, Барселона донесе одлука да се раздели со својот досегашен тренер Роналд Куман кој ќе се збогува со играчите в четврток.

Во својот последен меч на клупата на каталонскиот гигант, холандскиот стратег загуби од Рајо Ваљекано со 1:0, стрелец на голот беше Фалкао, а голем придонес имаше и македонскиот репрезентативен голман Димитриевски кој го одбрани пеналот на Депај.

Претседателот на клубот од „Камп Ноу“, Жоан Лапорта сега ќе има за задача да бара нов тренер во следниот период. Барса со Куман оваа сезона забележа пет победи, исто толку порази и три нерешени на 13 мечеви.

Моментно екипата е дури на деветтото место со 15 бодови од 10 кола во шампионатот, заостанува шест зад водечкиот Реал Мадрид од кој загуби минатиот викенд на домашен терен.

Покрај тоа, Каталонците загубија и два од трите досегашни средби во Лигата на шампионите. Куман го водеше тимот од август 2020 година, а на 67 средби забележа севкупно 40 победи, 16 порази и 11 натпревари завршија реми.

По доаѓањето во Барселона го „избрка“ Луис Суарез, а успеа да освои само еден трофеј, Кралскиот куп во минатата сезона. Во меѓувреме од клубот си замина и еден од најдобрите фудбалери на сите времиња, Лионел Меси…