Италијанскиот фудбалски тренер Клаудио Раниери денеска беше назначен за нов тренер на Рома и на оваа функција ќе биде до крајот на сезоната.

– Со задоволство можеме да објавиме дека Клаудио Раниери е новиот тренер на првиот тим на Рома. На крајот од сезоната Раниери ќе премине во директорска улога, каде што ќе биде советник на сопствениците на клубот за спортски прашања. Потрагата по иден тренер ќе продолжи во наредните месеци, во таа одлука ќе има придонес и Клаудио – пишува сајтот на Рома.

Раниери ќе стане трет тренер на Рома оваа сезона, по Даниеле Де Роси и хрватскиот стручњак Иван Јуриќ.

Раниери претходно двапати беше тренер на Рома, прво од 2009 до 2011 година, а потоа повторно во 2019 година.

Во својата кариера тренираше уште 18 екипи, меѓу кои Јувентус, Интер, Атлетико Мадрид, Челси и Лестер, со кои ја освои Премиер лигата во 2016 година.

Рома е моментно на 12 место на табелата во Серија А со 13 бодови.