По разделбата со косовскиот кошаркарски клуб Трепча од Митровица, нашиот селектор Александар Јончевски веднаш пронајде нов тренерски ангажман.

Стратегот на македонската сениорска репрезентација постигна договор со прволигашот од Гевгелија, Кожув.

За Јончевски ова ќе биде своевиден „камбек“ во Кожув, ја водеше екипата од 2018 до 2021 година.

Потоа работеше во Гостивар, а претходно беше предводник од клупата и на екипите на Спартак Суботица и МЗТ Скопје Аеродром.

Досегашниот предводник на Кожув, Апостоли Апостолов останува во стручниот штаб како асистент на Јончевски. Поранешниот виешампион на Македонија се прегрупира и засили последните два месеци, донесе неколку квалитетни странски засилувања и со селекторот на клупата ќе се обиде да остане во зоната која води во разигрувањето за титулата.