Тимот на Оф-фест со особено внимание ја следи новонастанатата несакана ситуација со коронавирусот, делејќи ја загриженоста на светската јавност за натамошниот развој на состојбите и сите предизвици со кои се соочуваме во нашите животи.

– Програмата на фестивалот, којашто заедно со вас ја оценивме како една од највозбудливите досега, ја обелоденивме пред појавата на пандемијата на нашето тло. Истовремено, ја подготвуваме и програмата на октомврискиот џез-фестивал. Со солидна доза на умерен оптимизам, се надеваме дека 19. издание на Оф-фест, планирано за 2-6 јуни, ќе го реализираме во предвидениот период. Но, сакаме да ве информираме дека, доколку тоа биде невозможно, имаме во план алтернативни термини во вториот дел од годината, известија од Оф-фест.

Фестивалскиот тим посочува дека сегашната самоизолација можете да ја освежите и да ја сочувате својата ментална и духовна кондиција со многу нешта, меѓу кои и со разнобојноста на нивната веб-страница (www.offest.com.mk), која нуди богати содржини: фотографии, биографии, видео-спотови, линкови и прекрасна музика.

– Танцувајте дома! Светот е убав – велат од Оф-фест.

(Текстот е објавен во „Културен печат“ број 25, во печатеното издание на „Слободен печат“ на 4-5 април 2020)