Young Friends of the Earth Macedonia го организираа нивниот ​прв интернационален тренинг со активисти за социјална и климатска правда​, заедно со младите од Кипар и Хрватска. Три-дневниот тренинг, од 14 до 16 јуни, се одржа во Колешино, Струмичко, на тема „​Работење со загрозени заедници од екстрактивни индустрии​“, каде се зборуваше повеќе за одземањето на земја, борбите со рударството на луѓето во овие земји, но и на глобално ниво.

Младите се запознаа со темите на ​интерсекционалност ​и ​системски пристап​, односно земање предвид за сите можни социјални или општествени категории и аспекти при нивната работа. На тренингот се зборуваше за корисни алатки за организирање и мобилизирање со загрозени заедници, како и зајакнување на локалните движења преку методологијата на стратешка литигација. Како работа со загрозени заедници, беа разработени вистински примери на работа со ромски заедници, покрај локално и на интернационално ниво, како едни од групите на граѓани кои консеквентно трпи социјална, еколошка и економска неправда.

Просторот на тренингот се наоѓаше на место со прекрасна природа кое е само неколку метри оддалечена од куќите на локалните жители, каде веќе една недела се одвиваат и археолошки ископувања и отпочнување на планираниот рудник за злато Иловица-Штука. Активистите кои веќе 3 години се во борба за нивниот живот и земја, го посетија тренингот и раскажаа повеќе за нивната ситуација. Оваа прилика, младите активисти ја искористија за да ги посетат и поддржат токму овие загрозени заедници во Иловица и Штука. Тие ја изразија нивната ​поддршка и солидарност за борбата против отворање на рудникот на смртта преку креативни песни и натписи како „Природа, Здравје, Заедница = Вистинско Злато“. Борбата за живот не се случува само во Македонија туку и на многу места ширум светот, како што и ни споделија учесниците од Кипар за слична борба со рудникот за злато Матиатис во нивната заедница.

Тренингот е организиран како дел од Европската мрежа Young Friends of the Earth Europe, финансиран од Европската унија и програмата Еразмус.