Со неуспех резултираа обидите на косовскиот претседател да добие друго име за премиер на Косово од коалицијата на Демократската партија на Косово, Алијансата за иднина на Косово и Иницијатива.

Откако доби негативен одговор од правниот застапник на коалицијата ПАН, косовскиот претседател не посочи дали ќе ги продолжи консултациите со другите партии за да се обиде да го спроведе до крај овој мандат, така како што бара и Уставот. Но, сите партии ја отфрлија можноста да бидат дел од која било комбинација, пишува денеска „Коха диторе“.

Оваа недела се очекува да биде одлучувачка во однос на одредувањето на датумот на изборите. Претседателот на косовското Собрание, Кадри Весели, за во понеделник свика состанокот на претседателството со единствена точка на дневниот ред – Подготовки за одржување на пленарна седница за распуштање на шестото законодавно Собрание.

Но, пред да се распуштат себеси, Демократскиот сојуз најави дека бара седница за гласање за фондовите на Европската унија-ИПА, кои се околу 90 милиони евра.