„Одложен“ трансферот во Галата: Алиоски се плаши од реакцијата на навивачите на Лидс!
Договорот на Езџан Алиоски со Лидс Јунајтед треба да истече следниот месец, по што ќе биде слободен агент.
Лидс му понуди на 29-годишниот македонски репрезентативец фудбалер продолжување на договорот неколку месеци наназад, но двете страни не се договорија и се чини дека нашиот играч ќе ја напушти Англија на крајот од сезоната.
Од друга страна и натаму ја има довербата кај менаџерот Марсело Биелса, има вкупно 32 настапи во Премиер лигата сезонава. Во изминатиот период Наполи покажал интерес за Македонецот за да го замени Фаузи Гулам кој е во заминување, но се остана само на тие информации.
Многу поголема е веројатноста дека ќе се пресели во Истанбул во редовите на Галатасарај кога ќе му истече договорот на „Еланд Роуд“. Така барем пренесува турскиот медиум „ФотоМач“, кој воедно тврди дека Алиоски го замолил Галатасарај засега да не го официјализира трансферот.
Тој веќе има преддоговор со Галата и чека да заврши тековната сезона за објавување на трансферот. Нашиот играч стравува од реакцијата на навивачите на Лидс кои не можат да ги заборават немилите настани во 2000 година кога двајца навивачи на овој премиерлигаш беа избодени во Истанбул на полуфиналниот дуел од тогашниот УЕФА куп помеѓу Галатасарај и Лидс.