Повеќе од 41.000 луѓе потпишале петиција со која се повикува на спречување на враќањето на американскиот милијардер Џеф Безос на Земјата после планираното патување во вселената следниот месец.

Безос, сопственикот на „Амазон“ и основачот на вселенската фирма „Блу ориџин“, најави на почетокот на јуни дека тој и неговиот брат Марк ќе одат во вселената со ракетата „Њу Шепард“ на 20 јули, што ќе биде првиот лет на компанијата со човечки екипаж.

Три дена по објавата на Безос, покренати се две петиции со намера дека ќе се спречи неговото враќање на Земјата. Двете стекнаа илјадници поддржувачи за само 10 дена, пишува Јаху њуз.

Повеќе од 36.000 лица ја потпишаа петицијата на „Change.org“ со насловот, „Не дозволувајте Џеф Безос да се врати на Земјата“.

„Милијардерите не треба да постојат… на Земјата или во вселената, но ако се одлучат за патувањето, тие треба да останат таму“, стои во описот на петицијата.

„Ако можат да испратат милијардер на Марс, зошто не ги испратат сите таму?“, праша една корисничка на „Change.org“.

Другата иницијатива, „Петицијата да не му се дозволи враќање на Безос на Земјата“, собра повеќе од 19.700 потписи. Основачот на петицијата, Хосе Ортиз рекол во описот дека Безос е „злобен господар насочен на глобална доминација“.