Одбележани 15 години од смртта на Слободан Милошевиќ
Во дворот на семејната куќа на некогашниот претседател на Србија и на СР Југославија, Слободан Милошевиќ се одбележани 15 години од неговата смрт. Венци на гробот положија претставници на СПС на чело со Никола Шаиновиќ, како и членови на Движењето на социјалистите, предводени од Александар Вулин.
– Еве нè пред споменикот на Слободан Милошевиќ, но негови главни споменици се Дејтонскиот договор и Резолуцијата 1244 кои претставуваат темел на кој Србија и Србите се борат за своите историски права, рече Шаиновиќ.
Тој напомена дека најголем дел од неговата делегација ја сочинуваат млади, трета генерација на партијата што ја основа Милошевиќ.
– Така се покажува главната особина на СПС, а тоа е траење, додаде Шаиновиќ.
Вулин истакна дека пријателите на Слободан Милошевиќ не беа ниту негови, ниту на Србија.
– Но, сите непријатели на Слободан Милошевиќ, беа искрени непријатели на Србија и тоа е непогрешливо, а историјата тоа ќе го потврди, кажа Вулин.
Одбележувањето на смртта на Милошевиќ и оваа година мина без неговите деца – синот Марко живее во Русија и ќерката Марија која е во Црна Гора.
Слободан Милошевиќ беше испорачан на Хашкиот трибунал на 28 јуни во 2001 година, каде и почина на 11 март во 2006 година. Три дена подоцна беше погребан во дворот во семејната куќа во Пожаревац, каде подоцна беше поставена и негова биста. Во април во 2019 година, крај неговиот гроб е закопана и урна со пепел на негопвата сопруга Мира Марковиќ која почина во Москва.