И покрај тоа што е намален бројот на починати во Ломбардија, жариштето на коронавирусот на Апенините, Италија заклучи уште еден ден со голема бројка на умрени, дури 812 лица.

Меѓутоа, еден податок многу ги охрабрува Италијанците, но и сите кои со големо внимание ги следат случувањата во земјата со 60 милиони жители, а тоа е бројот на новозаболени.

Имено, денес се забележани 4.050 нови случаи на заразени со коронавирус што е значително помалку од вчерашните 5.217 случаи. Во четвртокот имаше 6.153, петокот 5.909, во саботата 5.974….

Според мислењето на италијанските експерти епидемијата го достигнала врвот, и тие се надеваат дека до крајот на неделата ситуацијата би можела да биде значително подобра и пооптимистична.

Во Италија досега од коронавирус се заболени 101.739 лица, починати се 11.591, додека оздравени се 14.620 лица.