Малиот град Терниц во Долна Австрија одеднаш стана познат многу пошироко. Во него живеат 15.000 жители и е лоциран на 75 километри југозападно од Виена. Градот е со развиена метална индустрија и упориште на социјалдемократската СПО. Од средата наваму малото гратче во Австрија повеќе не изгледа просечно и неспектакуларно, пишува Рајнише пост.

Во Терниц, 19-годишниот Беран А. (Алији)  формираше сопствен исламистички центар за тероризам во куќата на неговите родители, каде што сè уште живее. И оттаму преку разговор на Интернет објави: „Сè уште имам големи планови“. Ова го објави највисокиот австриски федерален полицаец Франц Руф на прес-конференцијата што беше закажана за кратко време“.

Младиот човек, Австриец со потекло од Северна Македонија, планирал терористички напад на концерт на американската пејачка Тејлор Свифт во Виена. Во тоа се сигурни истражителите. Овој напад можеше да резултира со многу смртни случаи. Настапи на поп-ѕвездата, која многумина ја обожаваат, беа планирани во Виена на стадионот „Ернст Хапел“, во четврток, петок и во сабота пред околу 200.000 гледачи.

Но, поради „конкретните подготовки за терористички напад“, како што „бирократски“ вели полицаецот Руф, организаторот ги откажал сите концерти. Кога инспекторите дознале за заканата, во средата рано наутро го уапсиле 19-годишниот дома во Терниц, а голем број полицајци и експерти за експлозиви пристигнале да извршат детален претрес. Родителите и сестрата на Беран А. моментално се на одмор, јавува сосед за телевизијата Кроне. Осомничениот терорист секогаш се однесувал на „пријателски, совршен“ начин.

Наодите велат поинаку. Откриен е водород пероксид и готови експлозиви. „Запленивме оружје за сечење и прободување“, известува Омар Хајави-Пирчнер, шеф на Управата за државна безбедност и разузнавање во полицијата. Пронајдени се експлозивни детонатори и детонаторски кабли, оперативно сино светло како она што го користи полицијата со сирена, 21.000 евра фалсификувани пари и „тони пропаганден материјал од терористичката група Исламска држава (ИД).

Има видео од осомничениот во кој, според истражителите, тој дава „заклетва на лојалност“ кон ИС. Се вели дека за време на сослушувањата дал сеопфатно признание. Според Хајави-Пирчнер, неговиот план бил да стигне што подалеку до стадионот, а потоа да ги употреби ножевите и експлозивите за да „убие голема толпа луѓе и себеси“. Тој е „јасно радикализиран од ИД и мисли дека е правилно да се убиваат неверници“, вели Хајави-Пирчнер. Терористичкиот акт бил планиран за четврток или петок.

Беран А. имал и поддржувачи. Затоа истражителите претпоставуваат дека се работи за терористичка група. Тој бил во активен чет-контакт со 17-годишен Австриец од Виена. Младиот со турско-хрватски корени е исто така во притвор, но засега одбива да даде изјава. На истражителите им е познат како исламист. Тој е уапсен во реонот на стадионот. Пред само неколку дена, тој бил ангажиран во компанија која работела за организаторите на концертите на Свифт. Може да се претпостави дека имал пристап до стадионот.

Дополнително, сега на распит е и 15-годишник со турско потекло кој често бил во контакт со Беран А. Двајцата размениле идеи за експлозивните направи. Помладиот потврдил дека во изминатите неколку недели многу Беран А се променил. Според полицаецот Руф, на 25 јули 19-годишникот ја напуштил работата за да се посвети целосно на „подготовка за терористички напад“. Тој „забележително го промени својот изглед“, читал пропаганда на ИД и ја ширел идејата понатаму. Затоа, радикализацијата се случила во рок од неколку недели.

Сега постојано се истакнува дека тероризмот се интернационализира и дека станува сè помалку разбирлив. Според полицаецот Хајави-Пирчнер, радикализацијата се одвива на Интернет и ИД и Ал Каеда таму комуницираат со следбеници ширум светот. Соработката меѓу истражителите и тајните служби мора да биде исто толку глобална. Службеникот за државна безбедност известува дека дојава за планирањето напад во Виена добиле од странска служба. Според австриските медиуми, станува збор за американската ЦИА.

Едно е јасно: организаторот на концертот на Тејлор Свифт, „Баракуда мјузик“, самоиницијативно ги откажа концертите, немаше забрана. Дали тоа беше претерување? На крајот на краиштата, опасноста како да беше избегната пред концертите? Гувернерката на Долна Австрија, Јохана Микл-Лајтнер (ÖVP) не е сама во своето мислење дека откажувањето е „за жал успех и за радикалните исламисти“, пишува Рајнише Пост.