Обвинителите на СЈО „бомбите“ си ги преслушувале и дома?
Во СЈО со дозвола на поранешната шефица Катица Јанева се работело речиси без да се запазат безбедносните протоколи, пренесе Канал 5 повикувајќи се на извори од обвинителството.
Вработените во СЈО во секој момент можеле да ги преслушуваат бомбите од било кој компјутер. Безбедносниот протокол предвидувал забрана за вмрежување на компјутерите во СЈО, за да се избегне протекување на снимките од прислушуваните разговори и да се спречи вработените неовластено да вршат увид во работата на своите колеги. Но и оваа безбедносна мерка воопшто не била почитувана, односно само мал број на компјутери не биле вмрежени, како што е оној во архивата. Голем број на обвинители дури и ги изнесувале аудио бомбите и си ги носеле дома за, како што објаснувале, во мирна атмосфера да работат на нив.
Од СЈО за „Слободен печат“ велат дека има протоколи за безбедност од највисок вид и дека тие се почитувале. Како што објаснуваат прислушуваните разговори се чувале во посебен сеф од каде ги преземал на УСБ обвинителот кој бил назначен од Катица Јанева. УСБ биле кодирани и не било можно да се користат на друг компјутер освен на тој што го имале обвинителите во СЈО. Кога се слушале „бомбите“ според протоколот комјутерот се исклучувал од мрежниот кабел.