Репрезентацијата на Србија имаше одлични настапи на последните две големи натпреварувања на кои освои сребро на Мундијалот и бронза на Олимписките игри, сепак и во таква ситуација се уште нема одлука за продолжување на соработката со селекторот Светислав Пешиќ.

Пешиќ во овој момент е без договор, а се случи и смена на чело на федерацијата, па се шпекулираше дека Жељко Обрадовиќ е главен фаворит за нов српски селектор.

Сепак, сега се огласи самиот Обрадовиќ кој јасно стави крај на тие шпекулации.

„Нема да се вратам на селекторската функција, нема шанси. Таа приказна за мене заврши во 2005 година. Постојат луѓе во федерацијата со кои сум близок, Предраг Даниловиќ (новиот претседател) беше мој играч во Партизан. Тука сум ако треба помош со одредени идеи, но селекторската работа за мене одамна е завршена“, објасни Обрадовиќ.