В четврток (22 октомври) официјално ќе започне новата сезона и во второто по квалитет европско клупско натпреварување. Минатата сезона титулата во Лига Европа ја освои Севиља, а во пресрет на новата 2020/21 обложувалниците вообичаено ги одвојуваат екипите со најголеми шанси за трофејот во ова натпреварување.

Според „oddsportal.com“, на делба на првото место (квота, 8.06) се наоѓаат две англиски екипи, или доколку сакате подобро премиерлигашите Арсенал и Тотенхем. Голманот на „топчиите“ Дејан Илиев моментно е на позајмица во Шрусбери таун.

Тотенхем на португалскиот менаџер Жозе Мурињо мораше да помине дури три квалификациски кола (помеѓу нив и против Шкендија) за да стигне до групната фаза, а еве веќе е главен фаворит за титулата во ЛЕ.

Во неделата Тотенхем прокоцка предност од 3:0 против Вест Хем, а утре од 21.00 часот во рамките од групата „Ј“ ќе се обиде да го поправи впечатокот против ЛАСК од Австрија.

Трет фаворит сезонава во Лига Европа е Милан, а на четвртата позиција е Наполи на Елиф Елмас. Првата „десетка“ ја комплетираат Лестер, Виљареал, Баер Леверкузен, Рома, Реал Сосиедад и Бенфика.

Во големата листа на учесници (вкупно 48) некаде околу средината на фаворити е Динамо Загреб на Аријан Адеми, а на самото дно како најголеми „аутсајдери“ заедно со Дандалк и Омонија е Риека на Дарко Велковски и Милан Ристовски (повреден).

Гатузо: Елмас и натаму позитивен на ковид-19!