Облак: Нема да биде лесно, но дојдовме по трите бода!
Македонската фудбалска репрезентација в четврток од 20.45 часот против Словенија ќе го игра седмиот квалификациски натпревар, што е многу важен за пласман на континенталниот собир во 2020 година.
На денешната прес конференција, првиот репрезентативен голман на Словенија, Јан Облак има пофалби за нашата репрезентација, и воедно истакнува дека задачата нема да биде лесна.
– На првиот дуел пред нашите навивачи Македонија се покажа како една силна репрезентација, која има добар тим, индивидуалци. Не остваривме резултат каков што посакувавме на тој дуел (1:1). Затоа сега се надеваме дека в четврток ќе биде поразлично и покажеме многу повеќе. Знаеме дека нема да ни биде лесно. Македонија игра дома, атмосферата очекувам да биде одлична. Едвај чекаме да започне натпреварот. Се надевам дека на крајот ќе ги освоиме трите бода – вели Облак, чуварот на мрежата на Атлетико Мадрид.
Додаде играта на Словенија напредува од натпревар во натпревар, иако призна дека е променлива формата кај дел од играчите.
– Мораме да покажеме поголема желба за игра, за победа. Со „ладна глава“ да му пристапиме на мечот. Трпеливо да ја чекаме шансата, да не брзаме – додаде Облак.