Деновиве, од печат излезе стихозбирката „Ликовите во мене“ од Ерол Туфан во издание на „ПНВ публикации“. Новата стихозбирка е своевидно надоврзување на неговата претходна книга „Несоници“. Во поговорот кон збирката проф. д-р Весна Мојсова-Чепишевска напиша: „Ја доживувам како едно своевидно пеење-куќа. А куќата по својот состав претставува своевиден центар на светот, оска на вселената, но и средиште кое е заштита за луѓето што живеат во неа, заштита на нивните најважни духовни вредности. Сликата на домот и куќата е несомнено една од најсилните архетипски слики со богат, асоцијативен спектар.“

И понатаму: „И во тој дом, во таа куќа изградена врз фонот на контрастот светло-темно, ден-ноќ, радост-тага, Ерол Туфан широко им ги отвора портите на свои драги гости, на Ежен Јонеско, Шарл Бодлер, Фридрих Ниче, но и на Едгар Алан По и Алфред Хичкок, на Славе Ѓорѓо Димоски и Венко Андоновски, но и на сите оние кои сакаат преку читањето на оваа збирка да ги запознаат, како што вели и тој самиот – ликовите во мене!“

Ерол Туфан е поет, есеист и преведувач. Роден е во 1959 година, во Гостивар. Во 1992 се иселил во Турција. Студирал право во Скопје и Конија. Се занимава со политика, новинарство и право. Работи како самостоен адвокат во Истанбул.

Досега ги објавил книгата есеи „Книгољубецот“ (2006 и повторно во 2011), книгите поезија „Балкански син“ (2013), „Камчето од Вардар“ (2016), како и „Несоници“ (2020) и „Меланхолија“ (2020), двојазично издание на македонски и турски јазик. Книгите „Књигољубац“ и „Ерол трагом Ерола“ му се објавени во Србија (2016 и 2017). Ја приреди и во 2019 година ја објави книгата есеи „Компаративни поетики“, дел од богатата оставина на својот татко Музафер Туфан. Член е на Друштвото на писателите на Македонија, Удружење књижевника Србије и на Турската асоцијација на писателите.

(Текстот е објавен во „Културен печат“ број 73, во печатеното издание на „Слободен печат“ на 20-21 март 2021)