Обележани патеки, поставени видиковци и информативни табли во Кучково
Општина Ѓорче Петров заврши со мапирањето на велосипедската и пешачката патека кај локалитетот Крст во Кучково. Во оваа рекреативна зона, како што информира градоначалникот Александар Стојкоски, мапирани и обележени се 8 километри пешачка патека и 4,5 километри велосипедска, која е во кружна форма.
Жителите на општината и градот Скопје добиваат одлично урбанизирано место за спорт и рекреација во најубавиот туристичко-планински предел во општина Ѓорче Петров – вели Стојкоски.
Покрај мапирањето, на овој простор се поставени и четири видиковци, пет информативни табли со мапи, 15 информативни табли за културни знаменитости и 23 патокази, како и корпи за отпад, клупи и столпчиња за одбележување на трасата.
Инвестицијата е на Биро за регионален развој при Министерството за локална самоуправа и на општина Ѓорче Петров, а постапката ја спроведуваше Центарот за развој на скопскиот плански регион – информира градоначалникот.