Ново важно откритие: Обична настинка може да пружи заштита од ковид-19
Високите нивоа на Т-клетки, кои се развиваат по изложеноста на организмот на зараза со коронавирусот, кои ги предизвикува обичната настинка, може да обезбедат заштита од ковид-19, се вели во студијата на Империјал колеџ во Лондон објавена во понеделникот, која би можела да отвори нови патишта за вакцините од втората генерација.
Имунитетот против ковид-19 е комплексен и се верува дека, иако постојат докази за намалување на нивото на антителата шест месеци по вакцинацијата, Т-клетките исто така играат витална улога во обезбедувањето заштита од вирусот.
Студијата, која започна во септември 2020 година, ги испитуваше нивоата на Т-клетките како резултат од претходна обична настинка кај 52 контакти во домаќинството со позитивни случаи на ковид-19 набрзо откако испитаниците биле изложени на вирусот за да се види дали развиле инфекција.
Утврдено е дека 26 луѓе, кои не ја развиле инфекцијата, имале значително повисоки нивоа на овие Т-клетки во споредба со луѓето кои се заразиле.
Империјал колеџ не кажал колку долго ќе трае оваа заштита којашто ја пружаат Т-клетките.
„Откривме дека високите нивоа на веќе постоечки Т-клетки, кои телото ги произведува кога е заразено со други човечки коронавирус, како што е обичната настинка, може да заштити од инфекција со ковид-19“, рекла авторката на студијата д-р. Рија Кунду.
Авторите на студијата, објавена во „Nature Communications“, рекле дека внатрешните протеини на вирусот SARS-CoV-2 што ги таргетираат Т-клетките би можеле да понудат алтернативен пат за производителите на вакцини.
Актуелните вакцини против коронавирусот кој го предизвикува ковид-19 се насочени кон шилестиот протеин, кој редовно мутира, создавајќи варијанти како што е омикрон кои ја намалуваат ефикасноста на вакцината против симптоматска инфекција.
„Спротивно на тоа, внатрешните протеини на кои целат (таргетираат) заштитните Т-клетки што ги идентификувавме мутираат многу помалку“, вели професорот Аџит Лалвани, коавтор на студијата.
„Следствено, тие се разликуваат мошне помалку од една до друга варијанта на вирусот SARS-CoV-2, вклучително и омикрон. Според тоа, новите вакцини што ги таргетираат овие внатрешни протеини ќе развијат сеопфатни одговори на заштитните Т-клетки коишто би требало да штитат од сегашните и идните варијанти на SARS-CoV-2“.