Денеска во Кривичниот суд во Скопје продолжува судскиот процес „Трезор“ кој се однесува за незаконската набавка на прислушна опрема за поранешната УБК.

Случајот го води судијката Џенета Бегтовиќ и се наоѓа во доказна постапка. Застапници на обвинителниот акт се обвинителите Артан Ајро и Трајче Пеливанов.

Во „Трезор“ првообвинет е поранешниот директор на УБК, Сашо Мијалков, поранешниот шеф на неговиот кабинет, Тони Јакимовски, поранешниот помошник-министер во МВР, Небојша Стајковиќ и поранешниот началник на Петтата управа во МВР, Горан Грујевски.

Тие се обвинети за злоупотреба на службената положба и овластувања и предизвикување штета на Буџетот во висина од 862.045 евра за набавката на електронско-комуникациска опрема за потребите на Петтата управа при УБК и обука за нејзино користење од фирма од Велика Британија.