Ново писмо на активни француски воени лица посветено на „спасот на земјата”
По контроверзниот прв текст за еден вид „воен пуч”, по кој на некои потписници им се закануваат санкции, ревијата Валер Актуел синоќа објави ново писмо на активни француски воени лица „за опстанок на земјата”, јави дописникот на МИА.
На писмото се прикажани повеќе од 36.000 потписи по 1 часот по полноќ.
-Делувајте, дами и господа. Овој пат, не станува збор за прилагодени емоции, готови формули или медиумско покривање. Не станува збор за продолжување на вашите мандати или за освојување други. Станува збор за опстанокот на нашата земја, на вашата земја , пишуваат авторите во овој текст упатен до Претседателот на Републиката, до министрите, парламентарците и генералите.
Авторите велат дека тие „неодамна влегоа во кариерата” и прецизираат дека не можат „легално” да се изразат „со откриено лице”.
-Ние сме она што весниците го нарекоа „огнена генерација”. Мажи и жени, активни војници, од сите армии и од сите редови, од сите чувствителности, ние ја сакаме нашата земја. Ова се единствените наши титули за слава. И ако не можеме, според законот, да се изразиме со откриено лице, за нас е исто невозможно да молчиме, се претстават потписниците.
– Авганистан, Мали, Централна Африка Република или на друго место, голем број од нас доживеаја непријателски оган. Некои таму оставија другари. Тие ја понудија својата кожа да го уништат исламизмот на кој вие му правите отстапки на наше тло. Скоро сите ја знаевме операцијата „Сентинел”. Со свои очи ги видовме напуштените предградија, помирувањето со деликвенцијата. Поминавме низ обидите да се инструментализираат неколку верски заедници, за кои Франција не значи ништо – ништо друго освен предмет на сарказам, презир или дури и омраза, пишуваат тие.
Валер Актуел објави на 21 април шокантно писмо во кое „дваесетина генерали, сто високи офицери и повеќе од илјада други војници”, го повикаа претседателот Емануел Макрон да го брани патриотизмот и дека тие се „подготвени да ги поддржат политиките што ќе ја земат предвид заштитата на нацијата “. Овој текст предизвика жива полемика во политичката класа, некои го осудија квази-повикот за пуч кога други го поздравија повикот за спас.
Премиерот Жан Кастекс ја осуди иницијативата „спротивна на сите наши републикански принципи” и ја обвини РН (Марин Ле Пен), која ги повика потписниците да ја поддржат нејзината акција, за „политичко закрепнување”. Министерката за вооружени сили побара да се преземат санкции против потписниците, без разлика дали се активни или во пензија. Претставка од парламентарците од Непокорна Франција, за покренување обвинение, упатена до парискиот обвинител Реми Хајц, беше отфрлено, бидејќи според обвинителот нема „никакво кривично дело”.