Новите момци без респект, Циципас преку Федерер до финалето
Стефанос Циципас е првиот финалист на Мастерсот во Лондон откако за еден час и 37 минути игра со 6:3,6:4 го победи Роже Федерер во полуфиналето.
Младиот грчки тенисер до клучната предност во првиот сет дојде во вториот гем кога направи брејк, а веднаш потоа и го потврди на свој сервис за водство од 3:0 што претставуваше најава за големо изненадување.
Во вториот сет, повторно Цицпас прв зададе удар, направи брејк за водство од 2:1, но Федерер веднаш одговори со рибрејк и враќање на неизвесноста.
Дека младите се подготвени да ги наследат ветераните кои го издигнаа тенисот на повисоко ниво, доказ е петтиот гем, кога Циципас покажа дека е ментално е подготвен да се натпреварува на највисоко ниво, и повторно му го одзема сервисот на Федерер.
До крајот на вториот сет, успеа да ги одбие налетите на Федерер и сосема заслужено да триумфира со 6:4, што значеше пласман во финале.
Во утрешното финале, Циципас ќе игра против подобриот од второто полуфинале во кое се среќаваат Доминик Тим и Александер Зверев.