По големиот успех на филмската платформа Нетфликс, серијата „The Night Agent“ („Ноќниот агент“) ќе добие втора сезона, објави „Варајети“.

Овој акционен трилер ја доживеа својата премиера пред една недела, на 23 март, и за кратко ја освои публиката која го претпочита овој жанр и се најде меѓу десетте најгледани содржини на Нетфликс.

И втората сезона ќе има 10 епизоди.

„Да се добие ваква повратна реакција од гледачите е голема радост за нас и голема заслуга на нашата актерска екипа, нашите режисери, сценаристи и целиот тим кој работеше на серијата, како и нашите партнери од ‘Сони пикчрс телевижн’ и ‘Нетфликс’. Ние сме многу горди на успехот и возбудени за втората сезона“, вели создавачот на серијата, Шон Рајан.

„Среќни сме што ‘Тhe Night Agent’ станува инстантна глобална сензација и едвај чекаме да продолжиме да ја раскажуваме оваа приказна со нашата извонредна актерска екипа“, рече Кетрин Поуп, претседател на „Сони пикчрс телевижн“.

Серијата „The Night Agent“ е базирана на истоимената книга на авторот Метју Кирк и ја следи приказната на ФБИ агентот Питер Старленд.

Главните ликови ги играат Габриел Басо, Лусијан Бјукенан, Фола Еванс-Акингбола, Сара Дежардинс и Ив Харлоу.