Дискографската куќа „Шарла рекордс“ го објави новиот албум „Фалан филан“ на групата „Перија“. Тоа е второ нивно издание за етикетата „Шарла Рекордс“, по широко прифатениот „Кокало“ (ЕР) од јули минатата година. Групата „Перија“ на новиот албум е во состав Катерина Димитровска, Леа Милиновиќ и Филис Синаноска, три девојки од Скопје кои ги потпишаа и отсвиреа сите осум композиции.

Албумот „Фалан филан“ (жаргонски израз за „бла-бла“ на турски јазик) е на истата концепциска линија како и споменатиот претходник и со јасна идеја да го состави колажот на силно испреплетените музички и животни приказни на луѓето од балканскиот простор. И тоа со истата духовна сила со која опстанале низ историските премрежиња во она што денес го славиме како богато културно наследство. Станува збор за исклучително вреден музички артефакт, испеан на четири балкански јазици, изведен во манир на старите мајстори на традиционални инструменти, автентично, со љубов и посветеност кон традицијата, посочуваат од „Шарла рекордс“.

Материјалот е снимен во студиото „Алшар“, продуциран од Ивица Јанкуловски, а омотот на албумот го изработи младиот македонски уметник Сали Ертунч.

(Текстот е објавен во „Културен печат“ број 74, во печатеното издание на „Слободен печат“ на 27-28 март 2021)