„Eurohoops“ на своите читатели им постави анкета во која се бираат најдобрите кошаркари во последните 10 години. Се бираа најдобар европски кошаркар во НБА лигата, најдобар кошаркар во Европлига и најдобар тренер.

Во категоријата за најдобар европски кошаркар во НБА во изминатата деценија, највеќе гласови доби Дирк Новицки кој минатото лето замина во пензија. Легендарниот Германец доби 46% од гласовите, а на второто место се најде центарот на Денвер нагетс, Никола Јокиќ за кого гласаа 24% од гласачите. Трет е Јанис Адетокумпо кој доби 16% од гласовите.

Најдобар играч во Евролигата е бекот на Олимпијакос, Василис Спанулис кој освои 35% од гласовите. Тој во последните 10 години два пати триумфира во Евролигата, а е на второто место на вечната листа на најдобри стрелци во еминентното натпреварување.

Втор во изборот на фановите е легендарниот кошаркар на Панатинаикос, Димитрис Дијамантидис, додека трет е Богдан Богдановиќ.

Очекувано, Жељко Обрадовиќ е најдобар тренер во последната деценија. Сегашниот тренер на Фенербахче освои 49% од гласовите, а по него следат Чави Паскал со 16% и Пабло Ласо со 13% од гласовите.