Нови правила за живот со ковид-19: Спортистите ќе се тушираат дома, ќе носат шише за вода со име ќе им се мери температура пред тренинг!
За петмина спортисти на отворен простор да бидат обезбедени сто квадратни метри простор, предвидува новиот протокол за тренинг во поединечни спортови што го усвои владата на предлог на Комисијата за заразни болести.
Пред почетокот на тренингот организаторот е должен да им измери температура на спортистите и ако има некој со повишена температура, да го испрати дома.
На спортистите им се наложува да доаѓаат на тренинг веќе пресоблечени во опрема, на секое шише за вода да си го имаат испишано името за да не го „утнат“ шишето и што помалку да ги користат соблекувалните, како и да се возат во сопствени возила.
Новите правила наложуваат и туширањето да се остави за дома.
,,По завршување на тренингот спортистите и тренерот заминуваат дома поединечно без туширање и без влегување во соблекувалните почитувајќи ги мерките за физичко растојание, еден по еден”, се наведува во Протоколот за тренинг на спортисти во поединечни спортови.
Во обложувалниците пак, маски мора да носат и вработените и присутните играчи во просторијата.
На масите смее да има само 2 столчиња, шанковите да не служат пијалаци, на шалтер да има само еден играч, а следниот да чека на два метри растојание.
Сите обложувалници мора да имаат дезинфекциско средство и на влезот и на секој уплатен штанд.