Нови мерки во Црна Гора: Се забранува прослава на Нова година на отворено

Црна Гора ковид
Црна Гора за време на ковид кризата/ Фото: EPA-EFE/BORIS PEJOVIC

Владата на Црна Гора донесе нови мерки во борбата против епидемијата на коронавирус, кои ќе бидат на сила од 15 ноември до 1 декември. Забрането е организирање новогодишни прослави на отворено, концерти и масовни собири, пренесува РТЦГ.

Исто така се забранува организирање свадби, и на отворено и на затворено, како и работа на ноќни клубови. Работното време на угостителските објекти е ограничено до полноќ. Забрането е организирање ученички екскурзии и патувања, приватни прослави и родендени.

Престој во куќи и станови се препорачува само за членовите од исто домаќинство.

Националниот дигитален Ковид сертификат одамна е услов за преминување на државната граница, за престој во угостителски објекти, за присуство на приредби, спортски натпревари…

Министерката за здравство Јелена Боровиниќ Бојовиќ на прес-конференција рече дека Владата се уште ја разгледува можноста од 1 декември да воведе обврска за поседување сертификат за целата јавна администрација – здравство, образование, полиција, војска.

Исто така, од 1 декември, доколку се донесат овие мерки, сертификатот ќе биде неопходен за влез во јавниот превоз, трговски центри, спортски сали, деловни простории и деловни објекти во кои дејноста ја вршат повеќе од три фирми, односно претприемачи и објекти над илјада метри квадратни во кои се врши малопродажба на непрехранбени производи.

„Сите кои починаа во Црна Гора од 1 мај до денеска, а беа под 40 години, беа невакцинирани. Ги замолувам граѓаните да ги почитуваат мерките и да се вакцинираат за да се заштитат од тешки форми на болеста и смртни случаи и ги повикувам сите надлежни служби за контрола на мерките да бидат истрајни во заедничката задача – сузбивање на епидемијата”, рече министерката за здравство.