Нови детали од апсењето на сопругата на Ел Чапо: Дали поранешната мисица намерно се предаде?
Сопругата на познатиот нарко-бос Ел Чапо, која во понеделникот беше уапсена во САД, наводно намерно се предала со цел да го „сруши“ картелот Синаола, јавуваат светските медиуми.
Како што пренесува Вајс, Ема Коронел Аиспуро (31), иначе некогашна мисица кога била тинејџерка, беше уапсена заради обвинение за трговија со дрога, а извор на овој портал тврди дека таа била спремна да се соочи со обвиненијата кога слетала во Вашингтон.
Извори на овој медиум, кои барале да останат анонимни, сметаат дека предавањето на Ема би можело да сигнализира договор за соработка, па постои можност дека ќе предаде некои информации за властите, за да си помогне себеси и на својот случај, пренесува Дејли мејл.
Ема Коронел Аиспуро има американско и мексиканско државјанство, а обвиненијата за трговија со дрога се однесуваат на периодот од 2014 година до екстрадицијата на нејзиниот сопруг во САД во јануари 2017 година.
Таа исто така е обвинета дека му помагала на Гузман (63) во неговото бегство од затвор на 11 јули 2015 година, низ тунелот ископан под притворот во Алтиплано во Мексико.
Откако Ел Чапо беше повторно уапсен во јануари 2016 година во Мексико, Коронел наводно планирала негово ново бегство од затвор, пред да биде испорачан во САД во јануари 2017 година.