На „Јутуб“ се објавени нови снимки на кои се слуша лидерот на ВМРО-ДПМНЕ, Христијан Мицкоски, кој според еден од насловите, имал тајна средба со осумте независни пратеници од независната пратеничка група на ВМРО-ДПМНЕ, кои бeа исклучени од партијата.

Во првиот објавен разговор, Мицкоски зборува за активности и набројува дека третата е најважна, а тоа е Законот за јавно обвинителство. Тој објаснува дека на нелегален начин предметите од СЈО се префрлаат во надлежност на Јавното обвинителство.

„Третата активност која што е не помалку важна, можеби најважна, е Законот за јавното обвинителство. На комплетно нелегален начин ги префрлија предмет таму каде што ги префрлија и тоа за нив беше силно доволно за да продолжат политичките притисоци, уцени, закани, за политички неистомисленици. И они немаат желба понатаму да има решение по закон, иако фингираат преговори пред меѓународна заедница и пред нас и така натаму“, вели Мицкоски.

Во снимката насловена пак како „Лицемерие на Мицко“ лидерот на ВМРО-ДПМНЕ вели дека барал од општинските комитети да не ги напаѓаат осумте пратеници.

„Јас во изминатиот период како претседател на ВМРО-ДПМНЕ неколку пати ја поминав Македонија вклучувајќи ги и претседателските избори, ниту еднаш не ми ја спомнаа, а во општинските комитети секаде без исклучок, претпоставувам Ви пренесуваат барав да не бидете напаѓани“, вели Мицкоски.