Премиерот Зоран Заев денеска оствари средба со новата амбасадорка на Романија во Македонија, Адела Моника Аксинте која изрази целосна поддршка за европските перспективи на земјава, но и заедничка определба за натамошно унапредување на билатералната соработка.

На состанокот, како што соопштија од владиниот кабинет, е изразена целосна поддршка од Романија за европските перспективи на нашата држава, и оценето е дека тоа е стратешки интерес на целиот регион и на Европа.

• Пренесена е силна порака на охрабрување земјава да продолжи на патот на реформите коишто се во насока на доброто на граѓаните, како и на патот на остварувањето на стратешките цели. Констатирано е, исто така, дека членството на Република Северна Македонија во НАТО е придонес во безбедноста на целиот Балкан, а поздравени се и политиките на развивање на мултиетничноста и мултикултурата во земјата, како добар пример во пошироки рамки, се наведува во соопштението на Владата.

– Работиме на европски начин, преку политики на дијалог и се заложуваме за европски вредности. Минатото го поставивме како гаранција за иднината на граѓаните и државата и во таа насока продолжуваме. Сега сме фокусирани на заштита и помош на граѓаните и субјектите засегнати од пандемијата на здравствено-економски план. Економијата е стабилна и наша цел е, заедно со перспективите кон ЕУ, да отвораме економски перспективи за граѓаните и стопанството, посочил премиерот Заев.

На средбата е изразена заедничка определба за натамошно унапредување на билатералната соработка помеѓу Северна Македонија и Романија во областа на економијата и трговијата и преку поврзување на стопанските комори на државите. Од Владата соопштија дека се гледаат можности и за продлабочување на соработката и во областа на енергетиката, транспортот, туризмот, културата, образованието.