Легендарниот американски тенисер е загрижен за иднината на тенисот откако тројцата најдобри тенисери на денешницата, Роже Федерер, Рафаел Надал и Новак Ѓоковиќ, ќе заминат во пензија.
„Големата тројка“ заедно има освоено дури 53 Гран слем титули што е доволен доказ за нивната доминација во последните 15-тина години. Од 2006 година па досега, покрај „големата тројка“, титули на Гран слем турнирите освојувале само уште и Хуан Мартин Дел Потро (1 титула), Станислас Вавринка (3) и Енди Мареј (3) и Марин Чилиќ (1).

– На тенисот ќе му опадне популарноста бидејќи во изминатата деценија ги гледавме најдобрите играчи во историјата. Федерер е најдобриот играч кој некогаш сум го видел, Надал е сензационален шампион и некој кој идеално ја комбинира техниката со силата, додека Ѓоковиќ е вистинска машина. Не гледам тенисер кој ја има нивната харизма, можеби Зверев е најдобар од младата генерација но сепак е далеку од нив – изјави Мекинро во интервјуто за францускиот весник „Фигаро“.

Славниот тенисер е свесен дека сегашниот тенис е многу напреднат од времето кога тој доминираше на терените.
– Се игра далеку побрзо и тенисерите мора да бидат добро физички подготвени. Во САД, најдобрите атлети се во американскиот фудбал и во кошарката. Доколку се заинтересираа за тенисот, сега САД повторно ќе имаше големи шампиони како Пит Сампрас – потенцира Мекинро.