Нова студија: Печурките се потат, за да се разладат
Нова студија открива дека, печурките и веројатно сите габи имаат способност да се разладат со помош на испарување на водата која ја содржат, пишува „Лајф сајенс“.
Научниците, иако сè уште не знаат зошто габите ја поседуваат оваа способност, сметаат дека новото откритие ќе помогне при изучувањето на комплексната биологија на габите, а може да даде и позитивни резултати за здравјето на луѓето.
За ова истражување користена е инфрацрвена камера со која се направени фотографии од повеќе печурки во шума. На фотографиите, научниците забележале дека температурата на печурките е пониска од околината во која се наоѓаат.
Тимот од научници овој феномен кај печурките дополнително го истражувале во својата лабораторија и утврдиле дека различните видови на печурки се разладуваат преку испарување на вода од нивната површина, што во суштина значи дека тие се потат.
Во нивниот труд, научниците велат дека печурките преку овој феномен, создаваат оптимални услови за формирање и размножување на спори.
Тие се ентузијасти и сметаат дека ова откритие остава простор да се дознае релацијата на габите со другите единки во околината, вклучувајќи ги и луѓето. Доколку се дознае зошто габите претпочитаат пониски температури, може ќе се спречат габичните инфекции кои влијаат врз здравјето на човекот. Познато е дека над 1,5 милиони луѓе годишно се жртва на габични инфекции.