По пребројани резултати од 99% од избирачките места, симулацијата на Државната изборна комисија за распоредот на пратенички мандати по вчерашните парламентарни избори доживеа и мали промени. ДУИ, која во симулацијата со пребројани резултати од 95% од гласачките места имаше 16 пратеници, сега има 15 мандати, а Левица доби еден пратеник, па сега има двајца, станува збор за Димитар Апасиев и Борислав Крмов. Резултатот на останатите партии останува ист.

Според последната симулација, за која сè уште постојат мали шанси да се смени, распоредот на силите во новиот парламент би бил:

СДСМ – 46 пратеника

ВМРО-ДПМНЕ – 44 пратеника

ДУИ – 15 пратеника

АА/А – 12 пратеника

Левица – 2 пратеника

ДПА – 1 пратеник

ДИК најави дека денеска по прибирањето и обработката на сите пристигнати материјали ќе ги соопшти првичните резултати од изборите и распределбата на пратеничките мандати.

На  десеттите парламентарни избори, кои првпат во актуелните услови на пандемија на коронавирусот траеја три дена, правото на глас го искористија околу 923 илјади граѓани или приближно 51 отсто од запишаните гласачи во Избирачкиот список.