Јапонскиот премиер Фумио Кишида откри дека владата ќе размисли за давање условно, предвремено одобрување на ковид таблети, развиени од „Shionogi&Co Ltd“, пренесуваат странските медиуми.

„Ако клиничките испитувања ја потврдат безбедноста и ефективноста на лекот, би сакале веднаш да го разгледаме“, истакна Кишида на состанокот на парламентарната комисија што беше емитуван на телевизија.

Шионоги одделно извести дека новите резултати од тековното клиничко испитување на лекот, познато како „S-217622“, ​​покажале „значајна разлика“ во антивирусниот ефект во споредба со плацебото, како и подобрување на симптомите.

Извршниот директор Исао Тешироги им рече на новинарите дека компанијата може да аплицира за рано одобрување на лекот веќе следната недела и дека е во состојба да испорача еден милион дози до крајот на март.

Весникот „Mainichi“ претходно објави дека Јапонија размислува да дозволи „Shionogi“ да продава антивирусни орални таблети уште оваа пролет, откако ѝ дала на фармацевтската компанија специјална дозвола да ја прескокне последната фаза од клиничкото испитување.