Дебитантскиот роман „Денот на црвот“ од Симона Јованоска е објавен како 195-то издание во едицијата „ПРОаЗА“ на „Или-или“, со што продолжува поддршката и издавањето на квалитетни македонски автори од оваа скопска издавачка куќа.

– Романот „Денот на црвот“ изобилува со свежи компарации никаде досега сретнати, ненаметлива духовитост, понекогаш и со одмерена доза сарказам. И без исклучок: проникливост и интелигентност! Сето ова во комбинација со неспорниот талент и безмалку зачудувачки зрелата раскажувачка вештина, му овозможува на нејзиното дело висок дострел – напиша писателката и новинарка Јагода Михајловска-Георгиева за деби-романот на Симона Јованоска.

Авторката Симона Јованоска во 2015 година ја објавува дебитантската книга раскази „Ги најдов во длабокото“ во издание на „Или-Или“. Во 2019 година добива второ место на конкурсот на дневниот весник „Нова Македонија“ за расказот „Последниот кат“. „Денот на црвот“ е нејзин прв роман.

(Текстот е објавен во „Културен печат“ број 84, во печатеното издание на „Слободен печат“ на 12-13 јуни 2021)