Историчарката на книжевноста и доктор по филолошки науки, Вера Стојчевска – Антиќ, во издание на „Панили“ ја објави својата најнова книга, која во целост е посветена на неговото величество – зборот.

Пишувајќи ја книгата „Допирот на зборот“ професорката по македонска средновековна книжевност Вера Стојчевска – Антиќ открила дека дефинициите за зборот можат да бидат многу различни, привлечни и разновидни. Нејзиниот пристап во создавањето на книгата е научен, изразот е есеистички, а со собраните материјали, вели, може да се објави уште една книга, бидејќи темата е благородна и многу широка.

– Почетоците на идејата за книгата водат до мојот предмет на факултетот. Предавав средновековна македонска книжевност и со Евангелието од Јован ми започнуваа првите лекции за студентите. Ме заинтригираа стиховите „во почетокот беше словото…“ уште тогаш, како млад асистент, и до денес предизвикуваа внимание, не само кај мене, туку и кај сите што се занимаваат со средновековна книжевност. Истражувајќи низ многу материјали за книгата открив многу дефиниции за зборот, а дел од нив во есеите и низ стихови од избрани современи автори се објавени во книгата – открива Вера Стојчевска – Антиќ.

Покрај есеите за зборот (словото), во книгата се објавени и 60-ина пословици и поговорки од Марко Цепенков во кои се среќава „зборот“, како и избор со 50 примери на авторско дефинирање на зборот во поетски и прозни творби. Поговорот за книгата „Допирот на зборот“ го напиша д-р Васил Тоциновски.

– Зборот е апсолутна вредносна мера за трите егзистенцијални димензии: човекот, времето и просторот. На таа вистина повикуваат/укажуваат уводните стихови од Евенгелието на Јована: во почетокот беше Словото, / и Словото беше во Бога, и Бог / беше словото. Логосот е почеток и краj на универзумот. Едноставно познато е тој е збор, мисла и разум. Божествен разум и божествено вдахновение е во идеалистичката филозофија. Во материјалистичката филозофија е сеопшта законитост на развојот и движењето. За неуморната универзитетска професорка Вера Стојчевска – Антиќ бил предизвик за создавање на едно ново, интересно и оригинално дело во македонската пратика. По предговорот редоследно се поглавјата: Книжевното и филозофско величие на зборот, Поетски зборотек, Зборот на писателот, Ме убива пресилниот збор, Пословици и поговорки од Марко Цепенков кои го содржат зборот и Избор од застапени творби. Во разгледување и толкувања на темата се користи есеистичкиот пристап со јасни и читливи согледувања, толкувања и вреднувања. Секој дел е самостојна текстовна целина, а потрагата по мислата и смислата на логосот е она што ги поврзува и обединува – пишува Васил Тоциновски во поговорот кон книгата „Допирот на зборот“ од Вера Стојчевска – Антиќ.

(Текстот е објавен во „Културен печат“ број 77, во печатеното издание на „Слободен печат“ на 17-18 април 2021)