Издавачката куќа „Или-Или“ ја објави книгата „Цут на цреша“ од Алина Апостолска. Насловот на делото е поткрепен со додавката „во потрага по тајната на своето потекло“. Авторката Алина Апостолска е родена 1961 година во Скопје. Најголем дел од животот го поминала во Париз, а од 1998 година живее во Монтреал, Канада. Историчарка по образование, таа работи како новинар во доменот на културата, но, исто така, и како издавач, предавач и организатор на настани. Има објавено околу триесетина книги за млади и возрасни. Нејзиниот роман „Едно лето од љубов и пепел“ ја доби наградата на генералниот гувернер на Канада.

Содржината на делото „Цут на цреша“ се однесува на Марк Нгијен, инженер што работи за Армијата на САД и кој никогаш не се интересирал за своето минато. Но, кога неговата маќеа умира и кога неговата жена му открива дека е бремена, нема друг избор освен да ја разоткрие тајната на своето потекло. Од Бостон до Хо Ши Мин-Вил, од Лос Анџелес до Монтреал, Марк го минува, но сега, во обратна насока, животниoт пат што е зацртан за него и „којзнае што прави“, како што изјавува, неговиот очув. На 24 јуни, на денот на неговиот триесет и осми роденден, на аеродромот во Монтреал, тој има средба со тајната на своето постоење. Во овој интимен трилер, лирската проза на авторката побудува едно размислување за идентитетот и наследството, посочија од „Или-Или“.

(Текстот е објавен во „Културен печат“ број 68, во печатеното издание на „Слободен печат“ на 13-14 февруари 2021)