Драмски театар Скопје ја продолжи традицијата за поддршка и промовирање на помладите колеги, студенти и дипломци на Факултетот за драмски уметности. Конкретен чин на поддршка беше изведбата на претставата „Семејство“ на авторот Роналд Харвуд на сцената на Драмски театар на 25 март.

„Семејство“ е дипломска претстава на студентите на ФДУ во класата на проф. Зоја Бузалковска и доц. Александар Степанулески. Претставата е со мото „Семејствата се добри затвори“ и на интересен начин ни ги пренесува семејните релации.

Во претставата играат Мартин Ѓоргоски, Сара Спиркоска, Лазар Христов, Ања Митиќ, Леонардо Лазов, Анастасија Величковиќ, Стефан Николовски, Нела Павловска и Јана Вељановска.

Освен на Академската сцена на ФДУ, со оваа претстава младите актери гостуваа и на МТФ „Војдан Чернодрински“, а во најава се и неколку нови гостувања на сцените на македонските театри.

Станува збор за комплетен театарски производ кој може да се постави на секоја театарска сцена низ државата, а притоа да се види и креативниот потенцијал и талент на една нова и млада генерација актерки и актери.

(Текстот е објавен во „Културен печат“ број 173, во печатеното издание на весникот „Слободен печат“ на 1-2.4.2023)