Хрватскиот репрезентатиџвец Марсело Брозовиќ повторно се најде во центарот на нов скандал во Италија и повторно поради него мораше да интервенира полицијата.

Фудбалерот на Интер откако пред две недели остана без возачка дозвола поради возење во алкохолизирана состојба и поминување на црвено светло на семафор, Брозовиќ сега направи хаос во ургентен центар во болница во Милано.

Тој упаднал во болницата со 42-годишен пријател од Хрватска кој имал полесни повреди на ногата но се однесувал агресивно, пренесуваат италијанските медиуми.

На Брозовиќ не му се допаднало тоа што лекарите му рекле дека имаат поитни случаи од тој на неговиот пријател и дека ќе мора да почекаат, по што фудбалерот почнал да ги навредува лекарите и бил подготвен дури и физички да се пресмета со нив. Веднаш била повикана полиција која спречила поголем инцидент.

На крајот играчот на Интер им се извинил на лекарите и останатиот персонал во болницата како и на пациентите, но нема да се спаси од нова казна од клубот кој претходно му најави дека нема да толерира никакви испади.