Нов соиграч на Елмас позитивен на коронавирус, и во Торино има позитивни
Андреа Петања е позитивен на ковид-19, потврди Наполи.
Петања е фудбалер на Наполи кој минатата сезона настапуваше за Спал кој во јануари го продаде фудбалерот, но двете екипи се договорија тој да ја доигра сезоната во стариот клуб.
Иако, се уште официјално нема одиграно натпревар за Наполи, неговиот нов тим ја извести јавноста за позитивниот случај.
„Андреа е позитивен на ковид-19, и тоа откако претходно неговиот брат беше позитивен. Петања нема симптоми, се наоѓа во карантин и ќе му се приклучи на тимот кога ќе оздраве“, стои во соопштението на Наполи.
Петања има 25 години, а Наполи за него плати 17 милиони евра.
Наполи не е единствениот италијански тим кој има фудбалери позитивни на коронавирус, бидејќи Торино соопшти дека двајца негови играчи исто така се заразени.
Фудбалерите на Торино беа тестирани пред почетокот на подготовките за новата сезона, а резултатите покажаа дека има двајца позитивни на ковид-19.
„ Играчите кои немаат симптоми но се позитивни, се испратени во изолација согласно со протоколот. Како дополнителна мерка на претпазливост, уште тројца фудбалери кои во претходните денови имале контакт со заразените, исто така се испратени во самоизолација“, објави Торино.