Барања од протест во Кичево против поскапување на струјата: Укинување на монополот на ЕВН, распуштање на РКЕ, намалување на цената

Фото: mia.mk

Група кичевци попладнево протестираа против поскапувањето на електричната енергија. Тие повторно се движеа бавно во колона од неколку десетици возила на магисталата Скопје – Охрид во делот што минува низ Кичево, од селото Другово, до крстосницата кај РЕК „Осломеј”.

Од Иницијативниот одбор соопштија дека целта на протестот е да се потенцираат веќе познатите барања за ​​повлекување на одлуката за зголемување на цената на електричната енергија од 7,4 проценти, за намалување на нејзината цена за домаќинствата за 46 отсто, за укинување на монополот на услугите на ЕВН, за распуштање на Регулаторната комисија за енергетика (РКЕ) и за формирање „независна Регулаторна комисија во служба на граѓаните, што ќе го контролира квалитетот на услугите од областа на енергетиката”.

Тие, исто така, побараа и намалување на ДДВ-то од 18 на 5 отсто и за укинување на доплатата од 33 проценти на електричната енергија. Инаку овој беше вкупно шести протест против поскапувањето на струјата во Кичево.

Видео на денот