Tочно дваесет и пет години по култното деби „Новиот аспект на старата школа“ хип-хоп бендот „Чиста околина“ го објавија повратничкиот албум „Avant-garde Fatiguée“. Албумот беше најавен со сингловите „Си играме со рапот“ и „Малку поети“, а објавен е под етикетата „Филтер лабел“.

Музички, новиот албум на „Чиста околина“ ја задржува бескомпромисноста по која се познати, но овој пат, таа е засилена со креативна зрелост и силен авторски потпис. Тие храбро ги комбинираат психоделијата на „Funkadelic“ и бунтовноста на „Beastie Boys“ и ги пуштаат низ призма на надреализам зачинет со здрава доза на самоиронија. Материјалот е истовремено директен и повеќеслоен, базиран на сонични експерименти во кои детската љубопитност и техничката прецизност живеат во совршена хармонија.

Продуцент на албумот е Оливер Димитров, а автор на обвивката е сликарот и графички дизајнер Атанас Ботев.

(Текстот е објавен во „Културен печат“ број 82, во печатеното издание на „Слободен печат“ на 29-30 мај 2021)